ललितपुर। ललितपुरस्थित अल्का अस्पतालमा कार्यरत कर्मचारी गीता केसीको हत्या भतिजा निर्मल केसीले आफैले गरेको स्वीकार गरेका छन् ।
प्रहरी वृत चापागाउँका प्रमुख डिएसपी कृष्णराज ओझाले निर्मलले आफै गीताको हत्या गरेको स्वीकार गरेको जानकारी दिनुभयो । साथै उनीहरु बीच आर्थिक लेनदेन लगायत अरु सम्बन्ध बारे आरोपित निर्मलले मुख नखोलेको डिएसपी ओझाले बताउनुभयो ।
निजहरु घुम्न भनेर गएको र एक्कासि उनीहरु बीच झगडा भए पछि निर्मलले घाँटीमा सलले कसेर हत्या गरेको प्रहरीको अनुसन्धान पछि पत्ता लागेको हो ।
हत्या गरेको दिन बेलुका६ बजे नै निर्मल घर फर्किएको अनुसन्धानबाट थाहाभएको छ । गीताको हत्याको बारेमा थप अनुसन्धान भईरहेको डिएसपी ओझाले जानकारी दिनुभयो ।
हत्याको आशङ्कामा निर्मललाई ललितपुरकोे भैँसीपाटी घरबाट प्रक्राउ गरेर अनुसन्धानको लागि चापागाउँ प्रहरी कार्यालय पठाइएको थियो । ३९ वर्षीया गीताको शव गोदावारी नगरपालिका–१०, मुलडोलस्थित लेलेको जङ्गलमा भेटिएको थियो ।
