नेपालगन्ज ,नेपालगन्ज उद्योग वाणिज्य संघले अत्यावश्यक खाद्य बस्तुहरुको घुम्ती सेवा शुरु गरेको छ ।
कोरोना संक्रमण रोक्न लागू भएको लकडाउनमा उपभोग्य सामाग्रीको अभाव सिर्जना हुन नदिन संघले शनिवारदेखि यस्तो सेवा सन्चालन गरेको हो ।
पहिलो दिन नेपालगन्ज उपमहानगरपालिका वडा नं १ को कार्यालय र नेपालगन्ज किराना तथा खाद्य व्यवसायी संघसंगको समन्वयमा वडा नं १ मा उक्त घुम्ती सेवा सन्चालन गरियो ।
घुम्ती सेवामा गाडी मार्फत घर–घरमा चामल, दाल, पिठो, नून, तेल जस्ता अत्यावश्यक सामाग्री उपलब्ध गराइन्छ ।
घुम्ती सेवा सन्चालनको अवसरमा प्रदेश सांसद आईपी खरेल, नेपालगन्ज उद्योग वाणिज्य संघका अध्यक्ष अब्दुल वाहिद मन्सुरी, वडा नं १ का अध्यक्ष प्रमोद धिताल, संघका महासचिव रिचञ्जीवी ओली, कोषाध्यक्ष हरिलाल न्यौपाने, प्रवक्ता टंकबहादुर धामी, कार्यसमिति सदस्य श्यामसुन्दर अधिकारी र नेपालगन्ज खाद्य तथा किराना व्यवसायी संघका महासचिव टोपबहादुर थापा सहभागि थिए ।
भिडभाड नहुने गरी घुम्ती सेवाबाट अत्यावश्यक सामाग्री वितरण गरिने संघका अध्यक्ष मन्सुरीले बताए ।
प्रदेश सांसद खरेल र वडा अध्यक्ष रिजालले निजीक्षेत्रको सहकार्यमा बजारमा सिर्जना हुने अभाव अन्त्य गरिने उल्लेख गरे ।
