काठमाडौं । काठमाडौं महानगरपालिकाको मुख्य शहर क्षेत्र (कोर एरिया) को फोहोर रातारात उठाइएको छ। कोर क्षेत्रमा पर्ने १२ वटा वडाको फोहोर गएराती उठाएर टेकुस्थित प्लान्टमा लगिएको हो।
नेवार समुदायले मनाउने गाइजात्रा पर्व आज मनाईंदैछ। विगत दुई सातादेखि काठमाडौं महानगरपालिकाको फोहोर उठेको छैन्। गाइजात्राको दिनपनि फोहोर नउठ्दा हुने समस्याका बारेमा बिहीबार दिउँसो बसेको नगर कार्यपालिकाको बैठकमा चर्काचर्की भएको थियो।
त्यस लगत्तै महानगरको फोहोर ब्यवस्थापन समितिको आकस्मिक बैठक बसेर कोर एरियाको फोहोर उठाइएको महानगरका प्रवक्ता नवीन मानन्धरले जानकारी दिए। ‘कोर एरियाको विशेषतः गाइजात्रा निकालिने क्षेत्रको फोहोर राति नै उठाएर टेकु लगिएको छ,’ प्रवक्ता मानन्धरले भने, ‘बन्चरेडाँडामा भएको अवरोध र सडक मर्मतका लागि पनि प्रयास भइरहेको छ।’
केही वडाध्यक्षहरुले मेयर बालेन्द्र शाहलाई आजै राती फोहोर उठाउनपर्ने र बैठकमा अन्य एजेण्डामा छलफल नगर्ने अडान लिएका थिए।
वडाध्यक्षहरुको अडानपछि बैठकका अन्य एजेण्डामा छलफल नगरी फोहोर ब्यवस्थापन समितिको बैठक बसेको थियो।
सो बैठकले मुख्य क्षेत्रका फोहोर बिहीबार राति नै उठाउने निर्णय गरेको थियो। फोहोरले जात्रा नै सञ्चालनमा अवरोध हुने भएपछि महानगरपालिकाले तत्काल फोहोर उठाएर टेकु लगेको हो।
उता, ल्यान्डफिल साइट बञ्चरेडाँडामा फोहोर आजैबाट लान सकिने मेयर शाहले बताएका छन्। बिहीबारको कार्यपालिका बैठकमा बोल्दै उनले आजबाट बञ्चरेडाँडामा फोहोर लानेगरी तयारी भएको जानकारी गराएका थिए।
केही हप्तादेखि उठ्न नसकेको काठमाडौंभित्रको फोहोरले सडक र पेटि दुर्गन्धित भएका छन्। फोहोर ब्यवस्थापन गर्न नसकेको भन्दै केह िवडाध्यक्षहरु आक्रोशित भएका थिए।
शोक र उल्लासको संगम गाईजात्रा
भाद्र कृष्ण प्रतिपदादेखि अष्टमीसम्म आठ दिन मनाइने परम्परागत सांस्कृतिक पर्व ‘गाईजात्रा’ आज विभिन्न कार्यक्रम आयोजना गरी देशभर मनाइँदैछ । यस वर्ष जनैपूर्णिमा र गाईजात्रा पर्व एकै दिन परेको छ । पर्वको अवसरमा आज सरकारले देशभर सार्वजनिक विदा दिएको छ ।
नेवारी भाषामा ‘सापारु’ भनिने गाईजात्रा पर्वका क्रममा प्रहसन, सामाजिक विकृतिप्रति व्यंग्यात्मक प्रदर्शन, नाचगान तथा दिवंगत व्यक्तिको सम्झनामा रामायणको करुण रसका गीतहरू पनि गाइन्छ ।
गाईजात्रा मृत्यु संस्कारसँग सम्बन्धित पर्व भएको संस्कृतिविद् ओम धौभडेल बताउँछन् । नेपाली संस्कृतिले शोकसँगै हाँसोमा पनि साथ दिन्छ भन्ने प्रतीकात्मक अर्थ बोकेको पर्व हो यो । मृत्युमा शोक मनाउनुपर्नेमा हास्यव्यङ्ग्य गर्ने अनौठो चलन चलिआएको छ ।
कसरी सुरू भयो ?
राजा प्रताप मल्लले पुत्रशोकले विह्वल भएकी आफ्नी रानीलाई दुनियाँले पनि यस्तै शोक बेहोर्नुपर्छ भन्ने देखाउन ‘जनतालाई आ–आफ्नो घरका मरेका व्यक्तिका नाममा गाईजात्रा निकाली सहर परिक्रमा गराउनू’ भनी आज्ञा दिएका आधारमा यो पर्व शुरु भएको ऐतिहासिक तथ्य छ । यसबाट पनि रानीको मन शान्त हुन नसकेकाले विभिन्न प्रकारका प्रहसन तथा व्यंग्यात्मक कार्यक्रमसमेत गराउने आदेश दिएअनुरूप हास्यव्यंग्यको प्रचलन चलेको हो भन्ने जन श्रुति पाइन्छ । प्रताप मल्लको पालादेखि प्रचलनमा आएको भनिने गाईजात्रा हनुमानढोकास्थित राजप्रासाद भएर जानुपर्ने प्रथा अहिलेसम्म पनि जारी छ ।
यद्यपि गाईजात्रा प्रताप मल्लको समयभन्दा अघि नै थालिएको तर्क गर्ने विद्वानहरू पनि छन् । प्रताप मल्लले कुनै पनि अभिलेखमा यो पर्व आफूले शुरू गरेको उल्लेख नगर्नु र गोपालराज वंशावलीमा पनि त्यस्तो उल्लेख नहुनुले यो पर्व कम्तीमा ६०० वर्ष पहिले नै शुरू भइसकेको ती विद्वानहरूको तर्क छ । ६०० वर्ष पहिले जयस्थिति मल्लको समयको गोपालराज वंशावली ९पत्र ६१० मा ‘साँ यात’ उल्लेख छ । यो भनेको ‘गाईको यात्रा’ हो । यसले गाईजात्रा जयस्थिति मल्लको समयभन्दा पनि पहिल्यै शुरू भएको पुष्टि गर्ने संस्कृतिविद् पुरुषोत्तम लोचन श्रेष्ठको तर्क छ ।
गाई यात्रालाई जात्राको रूपमा विकास भने काठमाडौंका राजा प्रताप मल्ल, भक्तपुरका राजा जगतप्रकाश मल्ल र ललितपुरका राजा सिद्धिनरसिंह मल्लको समयमा भएको उनको मत छ । त्यो बेला गाईजात्रामा बाजागाजाको संस्कार थपिएको श्रेष्ठ बताउँछन् । जसरी र जहिले शुरू भए पनि गाईजात्रा पर्व हाँसो र आँसुको संगम रहिआएको उनी बताउँछन् ।
गाईजात्राका दिन एक वर्षभित्र दिवंगत भएका आफन्तको सम्झनामा गाई वा मानिसलाई गाईका रूपमा सिंगारी आ–आफ्ना क्षेत्रमा परिक्रमा गराउने र उनीहरूलाई श्रद्धालुद्वारा दूध, फलफूल, रोटी, चिउरा, दहीका साथै अन्न र द्रव्य दान गरिन्छ । यसरी नगरपरिक्रमा गर्नाले वर्षभरि मृत्यु भएका व्यक्तिहरू गाईको पुच्छर समाई वैतरणी पार हुन्छन् भन्ने धार्मिक विश्वास छ ।
गाईजात्रा पर्व काठमाडौं, ललितपुर, भक्तपुरका साथै काभ्रे, मकवानपुर, सिन्धुपाल्चोक, नुवाकोट, दोलखा, खोटाङ, भोजपुर, इलाम, सुनसरी, मोरङ, पर्सा, कास्की, पाल्पा, दाङलगायतका जिल्लामा पनि धुमधामका साथ मनाइन्छ ।
आजभोलि गाईजात्राका अवसरमा समाजमा विद्यमान विकृति र विसंगति उजागर गरिन्छ । सार्वजनिकरूपमा मनोरञ्जनात्मक तथा व्यंग्यात्मक ढंगले विविध कार्यक्रमको आयोजनासमेत हुन्छ । पत्रपत्रिकामा पनि सामाजिक कुरीतिलाई समेटेर हास्यव्यंग्य अंक प्रकाशित गरिन्छ ।
