डडेल्धुराको एउटा जंगलमा करिब आधा दर्जन गाईलाई पासो लगाएर सामुहिक हत्या गरेको फेला परेको छ । डडेल्धुराको गन्यापधुरा गाउँपालिका–१ स्थित सामुदायिक जंगलमा गाईको सामुहिक हत्या गरिएको पाइएको हो ।
गन्यापधुरा–१ को देउपाल सामुदायिक वन क्षेत्रमा ग्यालविन तारले पासो लगाएर सामूहिक गौ हत्या गरिएको भेटिएको स्थानिय पत्रकारले जनाएका छन् । घटनास्थलमा नेपाल पत्रकार महासंघको टोली पुगेको छ । पुगेका नेपाल पत्रकार महासंघका केन्द्रीय सदस्य उत्तर विष्टले करिब ५ वटा गाईको घाँटी ग्यालविन तारले बाँधेर सल्लाको रुखमा बाँधिएको अवस्थामा देखिएको बताएका छन् । यस्तै, एउटा गाईको बंगरा भेटिएको छ भने अर्को एउटा ग्यालविन तार खाली भेटिएको छ ।
घटना स्थलमा पत्रकार र प्रहरीको टोली पुगेको हो । प्रारम्भिक अनुसन्धानमा करिब ७ वटा गाईको हत्या भएको देखिएको छ । गाईलाई कसले र किन हत्या गरेको हो भन्ने कुरा खुलेको छैन । स्थानीय वन उपभोक्ताहरु घाँस दाउराको लागि जंगलमा पुग्दा गाईलाई पासो लगाएको देखेपछि प्रहरीलाई खबर गरेका थिए ।
यसअघि गत असोजमा पनि सुर्खेतको जंगलमा सामूहिक रुपमा गौ हत्या गरिएको थियो । नेपालगन्जवाट दैलेख लैजान भनेर गाडीमा लिएर गएका गाईलाई सुर्खेतको भिरमा खसालिएको थियो । समितिले घटनामा संलग्नहरुलाई कारबाहीको सिफारिस गर्दै गृहमन्त्री रामबहादुर थापा (बादल) लाई प्रतिवेदन बुझाएको भएपनि कसैलाई कारबाही भएको छैन ।
