नेपालगञ्ज, नेपालगञ्ज उप–महानगरपालिका वडा नम्बर १८ स्थित शान्तिनगर टोल नयाँ वस्तीमा बसोबास गर्दै आईरहेका विपन्न समुदायका लागि वडा कार्यालयले सोलार प्यानल वितरण गरेको छ ।
वडा अध्यक्ष दीपक वर्माले नगरभित्रैको वस्तीका बासिन्दा अध्यारोमा बस्न नपरोस भनेर सोलार प्यानल सहयोग गरेको जानकारी दिनुभयो ।
विपन्न समुदायको बस्ती भएकाले नागरिकहरु अहिले पनि अध्यारोमा बस्न बाध्य थिए, वडा अध्यक्ष वर्माले भन्नुभयो,– सोलारमार्फत भएपनि सहयोग गरौं भनेर वडाको पहलमा संघीय मामिला मन्त्रालयमार्फत सहयोग गरिएको हो ।
स्थानीय पुर्णे सुनारले वस्तीमा धेरैजसोको घरमा विद्युत मिटर नभएको बताउनुभयो । अधिकाँशको ऐलानी जग्गामा घर भएका कारण मिटर नपाएपछि छिमेकीको घरबाट लाईन तानिएको छ , उहाँले भन्नुभयो,–अब वडाले सहयोग गरेपछि सबैको घर झलमल हुने भयो ।
अर्का स्थानीय धनवहादुर बिटालुले ऐलानी जग्गामा घर भएका कारण धेरैले मिटर नपाएको बताउनुभयो । आर्थिक अवस्था कमजोर भएका परिवारले पनि मिटर राख्न सकेका छैनन, उहाँले भन्नुभयो,– अब सोलारले राहत हुने भयो ।
स्थानीय कर्णे सुनारले विपन्न वस्तीमा सोलार सहयोग गरेकोमा वडा अध्यक्ष लगायत वडा कार्यालयप्रति वस्तीका बासिन्दा आभारी भएको बताउनुभयो । वस्तीका ५४ घरपरिवारलाई पुग्ने गरि सोलार प्यानल वितरण सुरु गरिएको वडा अध्यक्ष वर्माको भनाई छ ।
संघीय मामिला तथा स्थानीय विकास मन्त्रालय अन्तर्गत तराई–मधेस समृद्धि विकास कार्यक्रम अन्तर्गत गरिव, मधेसी, मुस्लिम तथा पिछडिएको क्षेत्रमा वैकल्पिक उर्जाको योजना वडा कार्यालयले ल्याएको हो । कार्यक्रम अन्तर्गत २५९ सोलार जडान गर्ने वडा कार्यालयको योजना रहेको छ ।