काठमाडौँ। बहराइन गएका नेपाली कामदारमध्ये कोरोना भाइरसबाट एकैदिन ७७ जना संक्रमित भएका छन् । बहराइनको राजधानी मनामास्थित नेपाली दूतावासका अनुसार उनीहरु चारवटा कम्पनीमा काम गर्दै आएका थिए ।
बहराइनका लागि नेपाली राजदूत पदम सुन्दासले पछिल्लो तथ्याङले आफूलाई चिन्तित बनाएको बताए । ‘एउटा सुपरमार्केट र ३ वटा अलग अलग कम्पनीमा काम गर्ने नेपालीलाई संक्रमण देखिएको हो’, ,‘उनीहरुको स्वास्थ्य उपचार भइरहेको छ।’ उनले भने। योसँगै कोरोना भाइरसबाट संक्रमित हुने नेपालीको संख्या १२६ जना पुगेको छ ।
बहराइनमा संक्रमितको सख्या भने १५४६ जना पुगेको छ । जसमध्ये १२४६ जना निको भइसकेका छन् । बहराइनमा अहिलेसम्म कोरोना संक्रमणबाट ८ जनाको मात्रै मृत्यु भइसकेको छ ।
सुन्दासका अनुसार जोखिमपंर्ण मानिएको क्याम्ममा रहेका कामदारलाई नयाँ क्याम्पमा सार्ने काम भइरहेको छ । बहराइनमा झन्डै ३५ हजार नेपाली कार्यरत छन् ।
