निष्पक्ष खबर, पलपलमा सारा खबर

निष्पक्ष खबर, पलपलमा सारा खबर

गृहमन्त्री भाइ नरेशकुमार थापालाई थुनामा आदेश

काठमाडौं । उच्च अदालत पाटनले गृहमन्त्री रामबहादुर थापाका भाइ नरेशकुमार थापालाई थुनामा राख्न आदेश दिएको छ ।

थापाविरुद्धको ‘आपराधिक लाभ र संगठित अपराध’ मुद्दामा जिल्ला अदालत काठमाडौंको आदेश उल्टाउँदै उच्च अदालतका मुख्य न्यायाधीश नहकुल सुवेदी र श्रीमणकुमार गौतमको संयुक्त इजलासले थापालाई पुर्पक्षका लागि थुनामा राख्न आदेश भएको हो । ‘फिरौती’ उठाउने गिरोहसँगको मिलिभगतमा व्यवसायीलाई धम्क्याएर रकम असुलेको अभियोगसहित थापालगायत व्यक्ति पक्राउ गरी मुद्दा चलाइएको थियो । काठमाडौं अदालतका न्यायाधीश मेदिनीप्रसाद पौडेलको इजलासले उनलाई गत असोज १ मा १ लाख रुपैयाँ धरौटीमा छाड्न आदेश दिएको थियो ।

थापासहितका ६ जनाले थुनामा रहेका विवादास्पद अभियुक्त समीरमानसिंह बस्नेतसँग मिलेर व्यवसायीबाट रकम असुलेको अभियोग थियो । नेपाल निर्माण व्यवसायी महासंघका अध्यक्ष शरदकुमार गौचन हत्याका एक अभियुक्त समीरमानसिंहले जेलबाटै चलाएको असुलीसँग जोडेर प्रहरीले पक्राउ गरेको थियो । गौचनको ०७४ असोज २३ मा नयाँ बानेश्वरको शान्तिनगर ठूलो खरिबोटनजिक दिउँसै हत्या भएको थियो ।

ठेकेदारहरूलाई धम्क्याएर पैसा मागेको उजुरी गृह मन्त्रालय हुँदै प्रहरीसम्म पुगेपछि प्रहरीको विशेष ब्युरोले पवन खड्का र सुरेन नगरकोटीलाई पक्राउ गरेपछि दुवैले थापालाई पोलेका थिए । नख्खु कारागारमा राखिएका समीरमानसिंहले जेलभित्रैबाट फिरौती धन्दा चलाएपछि मुस्ताङ कारागार सारिएको थियो ।

जिल्ला अदालतले अन्य पाँच जनालाई पुर्पक्षका लागि थुनामा पठाए पनि थापालाई न्यून धरौटीमा मुक्त गरेपछि हिरासतमै राखेर पुर्पक्ष गर्नुपर्ने मागसहित सरकारी वकीलको कार्यालय उच्च अदालत पुगेको हो । जिल्लाले थापासँगै मुछिएका अन्य प्रतिवादी सुरेन नगरकोटी बलामी, विनोद लामा, सैलेश प्रजापति, पवन खड्का र बीरबल भट्टराईलाई मुद्दाको अन्तिम टुंगो नलागुन्जेल पुर्पक्षका लागि थुनामै राख्न भनेको थियो । आदेशविरुद्ध ५ प्रतिवादी र थापालाई धरौटीमा छाड्ने आदेशविरुद्ध सरकारी वकीलको दोहोरो निवेदन परेको थियो ।

उच्च अदालत पाटनका रजिस्ट्रार बाबुराम दाहालले ५ प्रतिवादीको हकमा जिल्लाकै थुना सदर र थापाको हकमा धरौटी आदेश बदर गरी पुर्पक्षका लागि थुनामा राख्ने गरी माघ २३ गते आदेश भएको जानकारी दिए । फिरौतीमा समातिएका अभियुक्त खड्काले थापासँग पटकपटक भेटेको र आरोपित कसूरका सम्बन्धमा भएको संवादको विस्तृत विवरणसमेत उल्लेख गरी थापालाई पोल गरेको देखिएको संयुक्त इजलासको आदेशमा उल्लेख छ ।

‘कनेक्सन अफ स्काइप कल चार्ट’ बाट बस्नेत र खड्काविच सम्पर्क देखिएको आदेशमा जनाइएको छ । मुख्य न्यायाधीश सुवेदी र न्यायाधीश गौतम संलग्न संयुक्त इजलासले आरोपी खड्काले थापासँग भएको कुराकानीको विवरण उल्लेख गरी अर्का आरोपी जावेद अनवरलाई स्काइपमा म्यासेज गरेको, जेलमा रहेका बस्नेत र सैलेश प्रजापतीको बयानबाटसमेत थापा र खड्कासँग पटकपटक भेटघाट भएको देखिएको भन्दै उच्चले थुनामा राख्नुपर्ने आधार लिएको छ ।

‘मिशिल संलग्न तत्काल प्राप्त प्रमाणबाट अहिले नै यी प्रतिबादी आरोपित कसुरका कसुरदार होइनन् भनी विश्वास गर्न सकिने आधार नदेखिएको,’ थुना आदेशमा भनिएको छ, ‘र, समान अबस्थामा अन्य प्रतिबादीहरुलाई थुनामा राखी मुद्दा पुर्पक्ष गर्नु भनी भएको आदेशसमेतका सन्दर्भमा निज प्रतिवादीसमेतलाई थुनामा राखी मुद्दाको पुर्पक्ष गर्ने आदेश गर्नुपर्नेमा धरौटी माग गर्ने गरी तहाँ अदालतबाट मिति २०७६, ६, १ मा भएको आदेश बेरितको देखिँदा बदर गरिदिएको छ ।’ थापालाई मुलुकी फौजदारी कार्यविधि संहिता, २०७४ को दफा ६७ बमोजिम थुनामा राखी मुद्दाको पूर्पक्ष गर्न भनिएको छ । यो आदेशसँगै अब थापा पनि अन्य अभियुक्तसँगै मुद्दाको किनारा नलागुञ्जेलसम्म जेलमै रहने भएका छन् ।

spot_img
spot_img
spot_img
spot_img
spot_img
spot_img

भर्खरै

सम्बन्धित खबर

Language »