तिहारमा लोडसेडिङ नहुने

नेपाल विद्युत् प्राधिकरणले तिहारमा निर्धक्कका साथ झिलिमिली बत्ती बाल्न सर्वसाधारणलाई आग्रह गरेको छ । अहिले पर्याप्त विद्युत् उपलब्ध रहेको र भदौमा भएको उच्च मागभन्दा पनि तिहारमा न्यून विद्युत् आवश्यक पर्ने भएकाले लोडसेडिङ नहुने प्राधिकरणका कार्यकारी निर्देशक कुलमान घिसिङले बताए । प्राधिकरणले आयोजनाको गरेको पत्रकार सम्मेलनमा भदौमा उच्च माग एक हजार ६ सय २० मेगावाट रहेकोमा तिहारमा १५ सय मेगावाट मात्र पिक लोड हुने प्रक्षेपण गरिएको जानकारी दिइयो ।

देशका विभिन्न ठाउँबाट झ्याप्प–झ्याप्प (ट्रिपिङ) बिजुली जाने गुनासोलाई गम्भीरताका साथ लिएको कार्यकारी निर्देशक घिसिङले बताए । विभिन्न ठाउँमा पोल सार्दा र स्थानीय व्यवस्थापनमा भएको कमजोरीले त्यस्तो समस्या भएको उनको भनाइ छ । अहिले देशभर जडित क्षमता दुई हजार मेगावाट पुगेको छ । त्यसमध्ये दिउँसोको समयमा दुई सय र रातिको समयमा पाँच सय मेगावाटबराबर विद्युत् खेर गइरहेको छ । 

नेपाल विद्युत् प्राधिकरणले अहिले वितरण प्रणाली सुधारलाई उच्च प्राथमिकतामा राखेको छ । तर, त्यसका लागि आवश्यक मिटर, ट्रान्सफर्मरलगायतका सामानको अभाव भएको कार्यकारी निर्देशक घिसिङले जानकारी दिए । ‘समयमा नै खरिद प्रक्रिया नथाल्दा यो समस्या आएको हो,’ उनले भने । प्राधिकरणले अहिले सात लाख मिटरको खरिद प्रक्रिया थालेको छ । त्यस्तै, ट्रान्सफर्मरको अभाव तत्काल हुन नदिन नेपाल इकरात कम्पनीसँग तीन हजार ट्रान्सफर्मर खरिद सम्झौता गरेको छ ।


प्राधिकरणले बेमौसमी वर्षाले गर्दा १० करोड रुपैयाँबराबरको विद्युत् खेर गएको जानकारी दिएको छ । त्यस्तै, पोल र अन्य संरचना भत्किएर चार करोड रुपैयाँको क्षति पुगेको छ । तर, यो प्रारम्भिक तथ्यांक मात्र भएको मंगलबार आयोजित पत्रकार सम्मेलनमा जानकारी दिइएको छ । केही उद्योगले अझै विद्युत् जडान नगरेको वा मात्र घटाएका छन् । 


कार्यकारी निर्देशक कुलमान घिसिङले आगामी एक–दुई वर्षभित्र नै एक हजार मेगावाट विद्युत्को लागि माग आउने सम्भावना देखिएको बताए । प्राधिकरणले गरेको अध्ययन सर्वेक्षणले यो तथ्य देखाएको हो । विशेष गरी रड उद्योग र अन्य उद्योगले विद्युत्को माग बढाउन सक्ने देखिएको छ । प्राधिकरणले अब हिउँदमा पनि लोडसेडिङ नहुने, तर केही वर्ष हिउँदमा भने भारतबाट आयात गर्नुपर्ने बाध्यता रहेको बताए । 

+ posts
Language »
%d bloggers like this: