सिरहा। सिरहामा लकडाउनका समयमा नेपालतर्फ प्रवेश गर्न खोज्ने समूह र सोहर्वामा खटिएका सशस्त्र प्रहरी झडप भएको छ । नेपाल आउन लागेकाहरुलाइ सीमामा रोक्न खोज्दा झडप भएको हो । नेपाल प्रवेश गर्न खोज्नेहरु भारतीय नागरिक रहेको बताइएको छ ।
झडपमा नेपाल प्रवेश गर्न खोज्ने समूहले प्रहार गरेको ढुङ्गा लागेर सशस्त्र प्रहरीका एक जवान घाइते भएका छन् ।
दूध लिएर नेपालतर्फ आउन लागेका ब्यक्तिलाइ सशस्त्र प्रहरीले रोक्न खोज्दा करीब २०–२५ जनाको समूहले ढुङ्गा हान्न थालेपछि झडप भएको सिरहाका सशस्त्र प्रहरी उपरीक्षक प्रवीण कँडेलले जानकारी दिनुभयो ।
घटनामा संलग्न मोहनकुमार यादवलाई नियन्त्रणमा लिई आवश्यक कारवाहीका लागि जिल्ला प्रहरी कार्यालय सिरहालाई बुझाएको सशस्त्र प्रहरी उपरीक्षक कँडेलले बताउनुभयो ।।
