प्रधानमन्त्री कप एकदिवसीय राष्ट्रिय क्रिकेट प्रतियोगितामा नेपाल पुलिस क्लब शीर्ष स्थानमा उक्लिएको छ।
पुलिसले मंगलबार तेस्रो जित निकाल्ने क्रममा वीरगञ्जमा अंक तालिकाको पुछारमा रहेको कोशी प्रदेशलाई ६ विकेटले हरायो।
पुलिसले पाँच खेलमा तीन जित निकालेको छ भने एक खेल रद्द र एक खेलमा पराजय भोगेको छ। उसको सात अंक भएको छ। सात अंक नै भएका मधेश र त्रिभुवन आर्मी क्लब रनरेटमा पछि छन्। कोशीले भने अहिलेसम्म जित निकाल्न सकेको छैन।
वीरगञ्जमा पुलिसले कोशीले दिएको १६३ रनको लक्ष्य ४ विकेटको क्षतिमा ३३.५ ओभरमा पूरा गर्यो।
पुलिसको जितमा रशिद खानले नटआउट ७३ रन र कप्तान आरिफ शेखले नटआउट ८१ रन बनाए। त्यसअघिका चार ब्याटर दोहोरो अंकमा रन नबनाइ आउट भए। जसमा दिनेश खरेलले २ रन बनाउँदा शंकर राना, अमित श्रेष्ठ र दिलसाद अली शून्यमा आउट भए। अमित र शंकर चौथो ओभरमा विपिन महतोबाट लगातार आउट भएका थिए।
त्यसअघि कोशी ४२.५ ओभरमा १६२ रनमा अलआउट भयो। उसका लागि सुमन श्रेष्ठले ४३ रन र सुजन थपलियाले ४८ रन बनाए।
बलिङमा पुलिसका दिनेश खरेलले ५ विकेट लिए। ललित राजवंशी र सागर ढकालको नाममा २-२ विकेट रह्यो।
