जंगली च्याउ खाँदा एकैघरका चार बालिकाको मृत्यु, पूरै परिवार बिरामी

जाजरकोट। जंगली च्याउको तरकारी खाँदा गम्भीर बिरामी परेका जाजरकोटको कुशे गाउँपालिका–१ स्याँक्रीका एकैघरका चार बालिकाको मृत्यु भएको छ ।

मंगलबा र तीन बालिकाको र सोमबार एकको मृत्यु भएको हो । च्याउ खाएका अन्य चारजना बिरामी परेका छन् ।

स्याँक्रीका ५० वर्षीय टेकबहादुर चलाउनेले ९ साउनमा जंगलबाट च्याउ टिपेर ल्याएका थिए । साँझ च्याउको तरकारी खाएका उनीहरूलाई त्यही रातिदेखि बिसन्चो भएको थियो ।

घरका आठैजना बिरामी परेकाले गाउँकै मेडिकलबाट औषधि लिएर खाएका थिए । उनीहरू च्याउ खाएको तीन दिनपछि सिकिस्त भएका थिए । त्यसपछि मात्रै गाउँलेले उपचारका लागि प्रयास गरेका हुन् ।

टेकबहादुरकी छोरी तीन वर्षीया अञ्जनाको सोमबार गाउँमै मृत्यु भएको जिल्ला प्रहरी कार्यालयले जनाएको छ । बालिकाको मृत्यु भएपछि परिवारका अन्य सातजना सदस्यलाई गाउँपालिकाले नेपाली सेनाको हेलिकोप्टर चार्टर्ड गरेर सोमबार नै सुर्खेतस्थित कर्णाली प्रादेशिक अस्पताल लगेको थियो ।

उपचारका क्रममै मंगलबार तीन बालिकाको मृत्यु भएको अस्पतालले जनाएको छ ।

च्याउ खाँदा बिरामी परेका टेकबहादुरसँगै उनका छोरा ३० वर्षीय ललित, बुहारी ३० वर्षीया कल्पना र छोरी १५ वर्षीया पशुपतिको प्रादेशिक अस्पताल सुर्खेतमै उपचार भइरहेको छ । 

+ posts

Leave a Reply

Your email address will not be published.

Language »