नेपालगञ्ज, कोरोना संक्रमण भएपछि आईसोलेशनमा रहनुभएका नेपालगञ्ज उप–महानगरपालिकाका उपप्रमुख उमा थापा मगर मंगलबारदेखि नियमित काममा फर्किनुभएको छ ।
वडा सदस्य शान्तिदेवी परियारको स्मृतिमा आयोजित श्रद्धाञ्जलीसभामा उपप्रमुख थापा सहभागी हुनुभयो ।
थापा कोरोना संक्रमण भएपछि करिब एक महिनापछि काममा फर्किनुभएको हो । स्वास्थ्यमा समस्या भएपछि घरमै आराम गरिरहनुभएकी थापालाई असोज २७ गते कोरोना पोजिटिभ भएको थियो ।
उहाँले पछिल्लो पटक आफुले पिसिआर परीक्षण गर्दा नेगेटिभ भएपछि नियमित काममा फर्किएको जानकारी दिदै आवश्यक पर्नासाथ प्लाज्म दिन तयार रहेको बताउनुभयो । उपप्रमुख थापा बाँकेमा कोरोना रोकथाम र नियन्त्रणका लागि सुरुवातदेखि नै अग्रभागमा खटिदै आउनुभएको छ ।
