नेपालगञ्ज, बाँके प्रहरीले कोहलपुरकी २२ वर्षीया सुमदरानी थारुको हत्याका अभियुक्त पक्राउ गरेको छ । अभियन्ता रुबी खानको नेतृत्वमा लामो धर्ना र अनशनपछि गृह मन्त्रालयले आराेपितलाई पक्राउ गर्ने सहमति गरेको थियो । गृहसँगको सहमतिको तीन दिनपछि अभियुक्त पक्राउ परेका हुन् ।
प्रहरीले सुमदरानीको हत्याका संलग्नताको आरोपमा बर्दिया राजापुर ८ का २६ वर्षीय शैलेन्द्र चौधरीलाई पक्राउ गरेको हो । पीडित परिवारको जाहेरीका आधारमा प्रहरीले खोजी गरिरहे पनि उनी फरार थिए । शुक्रबार जिल्ला प्रहरीको टोलीले बाँकेको जानकी १ पचपोखरास्थित नेपाल–भारत सीमा क्षेत्रबाट उनलाई पक्राउ गरेको हो । थप अनुसन्धानका लागि प्रहरीले पाँच दिन म्याद थपको अनुमति लिइसकेको जनाएको छ ।
नेपालगञ्ज उपमहानगर–९ मा डेरा लिएर अध्ययन गरिरहेकी सुमदरानीको घाँटी रेटेर हत्या गरिएको थियो । उनलाई निरन्तर पछ्याइरहेका युवाले बलात्कारपछि निर्मम हत्या गरेको आमा ललिता थारुले बताएकी थिइन् । छोरीको हत्याका अभियुक्तलाई पक्राउ गर्न माग गर्दैै उनी पनि काठमाडौंमा धर्ना दिन आएकी थिएन् । (शिलापत्र )
