काठमाडौं। प्रतिनिधि सभाको मंगलबारको बैठकमा सांसदहरूले चिकित्सा शिक्षा आयोगले लिएको ‘एमबिबिएस’को प्रवेश परीक्षामा मानवीय त्रुटि भएको विषयमा छुट दिन नहुने र दोषीलाई कडा कारबाही गर्नुपर्ने माग गरेका छन्।
राष्ट्रिय प्रजातन्त्र पार्टीकी सांसद रोशन कार्कीले आयोगले प्रवेश परीक्षामा मानवीय त्रुटि भएको भने पनि सत्य बुझ्न जरुरी भएको बताइन्।
‘चिकित्सा शिक्षा आयोगले लिएको प्रवेश परीक्षा त्रुटिपूर्ण भयो भनिएको छ। परीक्षामा मानवीय त्रुटि होइन, दानवीय त्रुटि भएको छ, यस्ता त्रुटि गर्नेलाई कडा कानुनी सजाय दिनुपर्छ,’ उनले भनिन्।
साथै प्रमुख प्रतिपक्षी नेकपा (माओवादी केन्द्र) का सांसद देवेन्द्र पौडेलले उच्च शिक्षालाई सुधार्नुपर्ने बताए।
चिकित्सा शिक्षा आयोगले अङ्कभारको आधारमा विद्यार्थीको नजिता सार्वजनिक गर्नुपर्नेमा रोल नम्बरको आधारमा गरिएकोप्रति उनले सम्बन्धित निकायको ध्यानार्षण गराए।
‘कसरी रोल नम्बरका आधारमा आयो, मानवीय गल्ती भनेर आइरहेको छ, विद्यार्थीको भविष्यसँग जोडिएको विषय हो। झण्डै तीन हजार विद्यार्थीलाई मेडिकल साईन्सको विषयमा यस्तो गञ्जागोल बनाउन हुँदैन, मेरिटका आधारमा पढ्न पाउने व्यवस्था गर्न सम्बन्धित निकायको ध्यानाकर्षण गराउन चाहन्छु,’ उनले भने।
राष्ट्रिय स्वतन्त्र पार्टीकी सांसद सुमना श्रेष्ठले चिकित्सा शिक्षा आयोगले एमबीबीएसको प्रवेश परीक्षाको नजिता प्रकाशन गरेको विषयमा सम्बन्धित निकायको ध्यानाकर्षण गराएकी छन्।
‘परीक्षामा भएको प्राविधिक त्रुटि भनेको के हो? त्यो भविष्यमा दोहोरिन नदिने के गर्नुपर्छ। सबैले परीक्षा दिन काठमाडौँ आउने व्यवस्थाको पनि अन्त्य गर्नुपर्छ, परीक्षामा प्राविधिक त्रुटि भएको भनिएको छ, त्यो के भएको हो? भावी दिनमा नदोहोरिन के गर्नुपर्छ?’ उनले भनिन्।
आयोगले भदौ १ गते परीक्षा लिएर १४ गते निकालेको नतिजाप्रति सांसदहरूले सरकारको गम्भीर ध्यानाकर्षण गराएका हुन्। प्रवेश परीक्षाको नतिजा सार्वजनिक गर्दा योग्यता क्रमको आधारमा गर्नुपर्नेमा त्यसो नगरिनु गम्भीर त्रुटि भएको सांसदहरुको भनाइ छ।
