काठमाडौँ । काठमाडौंका विभिन्न स्थानमा गुण्डागर्दीमा संलग्न रहेको आरोपमा १७ जनालाई प्रहरीले गएराति पक्राउ गरेको छ ।
जिल्ला प्रहरी परिसर काठमाडौं र काठमाडौं उपत्यका अपराध अनुसन्धान कार्यालयले छुट्टाछुट्टै टोली परिचालन गरी उनीहरूलाई पक्राउ गरेको हो । प्रहरीका अनुसार ‘अपरेसन सेफ्टी काठमाडौं’अन्तर्गत यो कारबाही सुरु गरिएको हो ।
जिल्ला प्रहरी परिसर काठमाडौंका एसपी पवन भट्टराईका अनुसार गुण्डागर्दीमा संलग्न भई ग्याङ निर्माणको प्रयास गरिरहेका ४ जनालाई पक्राउ गरिएको छ । श्याम लामा समूहसँग आबद्ध रही आपराधिक गतिविधिमा संलग्न प्रवीण तामाङ ‘डिम्पल’ पक्राउ परेका छन् ।
यस्तै, कलंकी–बाफल क्षेत्रमा गुण्डागर्दी गरेको आरोपमा बिर्जु महर्जन, कलंकीको बस टिकट काउन्टर–पेट्रोल पम्प क्षेत्रमा गुण्डागर्दी गरेको आरोपमा सुजन कार्की पक्राउ परेका छन् । स्युचाटार क्षेत्रमा ग्याङ बनाउन थालेको आरोपमा सुरु हमागाईं पनि पक्राउ परेका छन् ।
काठमाडौं उपत्यका अपराध अनुसन्धान कार्यालयले पनि थप १२ जनालाई पक्राउ गरेको छ । प्रहरीका अनुसार ठमेल, दरबारमार्ग र सामाखुसी क्षेत्रमा गुण्डागर्दीमा संलग्न उनीहरुलाई पक्राउ गरिएको हो ।
पक्राउ परेका उनीहरुमाथि थप अनुसन्धान भइरहेको प्रहरीले जनाएको छ ।
