काठमाडौं, राजन थापा।
स्वास्थ्य सेवा केवल उपचारको माध्यम मात्र होइन, मानवताको सबैभन्दा सुन्दर अभिव्यक्ति पनि हो। यही भावनालाई आफ्नो जीवनको मूल मन्त्र बनाएर दुई दशकभन्दा बढी समयदेखि स्वास्थ्य क्षेत्रमा निरन्तर सेवा गर्दै आउनुभएकी सबिना पपन गुरुङ आज हजारौं सेवाग्राहीका लागि भरोसाको नाम बनेकी छन्।
काठमाडौंको बसुन्धारा तथा हाल टोखा नगरपालिका–८ निवासी सबिना, पिता रामबहादुर पपन र माता मञ्जुदेवी पपनकी जेठी छोरी हुन्। परिवारबाट प्राप्त अनुशासन, संस्कार, इमानदारी र सेवाभावले उहाँलाई सानैदेखि जिम्मेवार र कर्मशील बनाएको थियो। त्यही संस्कारलाई आत्मसात गर्दै उहाँले आफ्नो जीवन स्वास्थ्य सेवामा समर्पित गर्नुभयो। स्वास्थ्य क्षेत्रमा २२ वर्षभन्दा लामो अनुभव बटुलिसकेकी सबिनाले आफ्नो जीवनका अमूल्य वर्षहरू बिरामीको सेवा, अस्पताल व्यवस्थापन र मानवीय सहयोगमा खर्चिनुभएको छ। यो यात्रामा अनेक चुनौती, संघर्ष र कठिन परिस्थितिहरू आए, तर उहाँ कहिल्यै विचलित हुनुभएन। बरु प्रत्येक चुनौतीलाई अवसरका रूपमा स्वीकार्दै अझ परिपक्व र सक्षम बन्दै जानुभयो।
हाल ॐ समाज डेण्टल अस्पताल, बनस्थली शाखा प्रमुख को जिम्मेवारी सम्हालिरहनुभएकी उहाँको नेतृत्वमा शाखाले सेवा, अनुशासन र विश्वासको क्षेत्रमा उल्लेखनीय सफलता हासिल गरिरहेको छ। उहाँको आत्मीय व्यवहार, सेवाप्रतिको निष्ठा र व्यवस्थापकीय दक्षताले अस्पताललाई सेवाग्राहीमाझ अझ लोकप्रिय बनाएको छ। सबिनाका लागि अस्पताल केवल रोजगारीको स्थान होइन, एउटा सामाजिक दायित्व हो। उहाँ विश्वास गर्नुहुन्छ—“बिरामीको पीडा बुझ्न सक्नु नै स्वास्थ्य सेवाको पहिलो धर्म हो।” त्यसैले उहाँ हरेक बिरामीलाई परिवारको सदस्यझैँ व्यवहार गर्दै उनीहरूको स्वास्थ्यसँगै आत्मविश्वास र मुस्कान पनि फर्काउने प्रयास गर्नुहुन्छ।
सहकर्मीहरूका अनुसार उहाँ एक असल नेतृत्वकर्ता मात्र होइन, प्रेरणाको स्रोत पनि हुनुहुन्छ। कठिन परिस्थितिमा पनि सकारात्मक सोच, सहकार्यको भावना र सेवाभावलाई प्राथमिकता दिने उहाँको शैलीले अस्पताल परिवारलाई एकताबद्ध बनाएको छ। आज सबिना पपन गुरुङको जीवनयात्रा धेरै महिलाहरूका लागि प्रेरणाको कथा बनेको छ। परिवारको संस्कार, व्यक्तिगत संघर्ष, अथक मेहनत र सेवाप्रतिको समर्पणले उहाँलाई यो सम्मानित स्थानसम्म पुर्याएको हो।
२२ वर्षको अनुभवसँगै अझै उस्तै ऊर्जा, उत्साह र समर्पणका साथ स्वास्थ्य सेवामा क्रियाशील रहनुभएकी सबिना पपन गुरुङले मानवताको सुगन्ध फैलाइरहनुभएको छ। उहाँको यही निस्वार्थ सेवा, कर्मप्रतिको इमानदारी र बिरामीप्रतिको आत्मीयता नै उहाँको सबैभन्दा ठूलो परिचय र सम्मान बनेको छ।
स्वास्थ्य सेवामा समर्पित यस्ता व्यक्तित्वहरू समाजका वास्तविक नायक हुन्, जसले आफ्नो कर्मबाट मानवताको उज्यालो फैलाइरहेका छन्।
— सामाजिक अभियन्ता तथा पत्रकार राजन थापा
