नेपालगन्ज, बाँके युनेस्को क्लबले जिल्लाका पाँचवटा पालिकाको सात वटा स्थानमा कतार च्यारेटी नेपालको आर्थिक सहयोगमा सातवटा सार्वजनिक शौचालय निर्माण गर्न शुरु गरेको छ ।
सर्वसाधारणको बढी उपस्थिति हुने र आवागमन हुने ठाउँमा शौचालय नहुँदा समस्या हुने गरेको हुँदा जिल्लाका सात वटा स्थानमा सार्वजनिक शौचालय निर्माण गर्न शुरु गरिएको बाँके युनेस्को क्लबका संरक्षक प्रवेज अली सिद्दिकीले बताउनुभयो ।
उहाँले बाँकेको कोहलपुर नगरपालिकाको कोहलपुर चौराहा र मदन चोकमा, नरैनापुर गाउँपालिकाको वडा नम्बर ६ कोहला र वडा नम्बर २ मियापुरमा तथा खजुराको कृषि हाटबजारमा, राप्तीसोनारीको शमसेरगन्जस्थित सर्पदन्स अस्पतालको छेउमा र बैजनाथ गाउँपालिकाको गाभरस्थित लायन्स पार्कमा सर्वसाधारणका लागि शौचालय निर्माण गरिने बताउनुभयो ।
ती शौचालय निर्माण गर्दा आवश्यकता हेरेर नगरपालिका र गाउँपालिकाले सिफारिस गरेको हुँदा सोही स्थानमा निर्माण गर्न लागिएको पनि क्लबले जनाएको छ ।
सो क्रममा विहिबार नरैनापुर गाउँपालिका वडा नम्बर ६ कोहलामा निर्माण गरिने शौचालयको गाउँपालिकाका अध्यक्ष ईश्तियाक अहमद शाहले एक समारोहविच सिलन्यास गर्नुभयो ।
सो अवसरमा बोल्दै उहाँले कतार च्यारेटी र बाँके युनेस्को क्लबले नरैनापुरको विकासमा निरन्तर सहयोग र हातेमालो गर्दै आएकोमा आभार व्यक्त गर्नुभयो ।
यस्तै क्लबका संरक्षक सिद्दिकीले सार्वजनिक शौचालयको जगेर्ना तथा सरसफाईदेखि हेरचाह गर्ने जिम्मेवारी समुदायको भएको हुँदा सो कार्यमा विशेष ध्यान दिन आग्रह गर्नुभयो ।
सो अवसरमा क्लबका कार्यकारी निर्देशक रवि तुलाधर लगायत स्थानीय वासिन्दाको ठुलो संख्यामा उपस्थिति रहेको थियो ।
काम विशेषले आवागमन गर्नेहरुको सुविधाका लागि निर्माण गरिने ती शौचालयमा धारा, पानी तान्ने मोटर र पानी ट्ंयाकीको पनि व्यवस्था गरिएको कतार च्यारेटी नेपालका इन्जिनियर आमिर फैजलले बताउनुभयो ।
कतार च्यारेटीले विपन्न, असहाय र गरिबका लागि तथा कोभिड १९ विरुद्ध पनि बाँकेमा विभिन्न प्रकारका सहयोग कार्यक्रमहरु गत केही समयदेखि सञ्चालन गर्दै आएको कतार च्यारेटी नेपालका प्रोगाम म्यानेजर इर्शाद शेषले बताउनुभयो ।
शौचालयको निर्माणमा प्रति शौचालय ६ लाख १२ हजार रुपियाँ खर्च हुने क्लबले जनाएको छ ।