काठमाडौं । काठमाडौं उपत्यकाका तीनवटै जिल्लाका प्रमुख जिल्ला अधिकारीहरुको संयुक्त बैठक मंगलबार बस्दै छ।
भदौ ३ गते मध्यरातदेखि लगाइएको निषेधाज्ञा बुधबार राति सकिने भएपछि थप रणनीति बनाउन बैठक बस्न लागेको हो।
भक्तपुरकी प्रमुख जिल्ला अधिकारी हुमकला पाण्डेले अपराह्न ४ बजे संयुक्त बैठक बस्न लागेको जानकारी दिइन्।
गत बुधबार मध्यरातिदेखि काठमाडौं, ललितपुर र भक्तपुरमा अत्यावश्यकबाहेकका गतिविधिमा रोक लगाउँदै निषेधाज्ञा जारी गरिएको छ।
काठमाडौंका प्रमुख जिल्ला अधिकारी जनकराज दाहालका अनुसार मंगलबार बस्ने बैठकले निषेधाज्ञा थप गर्ने वा के गर्ने भन्ने निर्णय हुनेछ।
उपत्यकामा कोरोना भाइरस संक्रमण जोखिम बढ्दै गएकाले केही दिन अझै निषेधाज्ञालाई निरन्तरता दिनुपर्ने सुझाव विज्ञहरुले दिँदै आएका छन्।
