रौतहट। रौतहटमा धारिलो हतियार प्रहार गरेर एक महिलाको हत्या गरिएको छ । जिल्लाकाे देबाही-गोनाही नगरपालिका– ५, टिकुलियामा शुक्रबार बेलुकी घरमै बसिरहेको अवस्थामा एक समुह आएर आक्रमण गर्दा घाइते भएकी जगरनिया देवीको मृत्यु भएको हो ।
सोही आक्रमणमा परेर घाइते भएका उनका श्रीमान महेश तिवारी पनि गम्भीर घाइते भएका छन् । उनको वीरगन्ज स्थित न्युरोड अस्पतालको आइसियुमा राखेर उपचार भइरहेको छ ।
आक्रमणपछि गम्भीर घाइते भएका दुबैजनालाई थप उपचारको लागि वीरगन्ज लगिएकोमा श्रीमती चाहिँको उपचारको क्रममा मृत्यु भएको जिल्ला प्रहरी कार्यालय रौतहटका प्रवक्ता प्रहरी नायव उपरिक्षक भरत श्रेष्ठले जानकारी दिए । उनका अनुसार प्रहरीले घटनामा संंलग्न भएको आरोपमा तीन जनालाई पक्राउ गरिएको छ ।
पक्राउ पर्नेहरूमा अक्षेलाल मुखिया, कविन्द्र मुखिया र बलि मुखिया रहेका छन् । घटनामा संलग्न रहेर फरार रहेका विजय मुखिया र रामबलि मुखियाको खोजी कार्य जारी रहेको छ ।
उनीहरूबीच पुरानो रिसइबीका कारण आक्रमण भएको प्रारम्भिक अनुसन्धानबाट खुलेको र घटनाबारे थप अनुसन्धान भइरहेको उनले बताए।
