काभ्रे जिल्ला प्रहरी कार्यालयले बैंकिङ कसुरको मुद्दामा काभ्रेली गुण्डा नाइके सत्यमान लामालाई पक्राउ गरेको छ । धेरै व्यक्तिहरुलाई रकम नभएको चेक दिएको ठगी आरोपमा उनी पक्रेका हुन् । सुरज सापकोटा महानगरीय प्रहरी बृत्त कमलपोखरी र रामकुमार थापा क्षेत्रीले महानगरीय प्रहरी परिसर काठमाडौंमा उनीविरुद्ध चेक बाउन्सको उजुरी दिएका थिए ।
२०७७ साल माघ २० गते उनले क्षेत्रीको नाममा काटेको ७० लाखको चेक बाउन्स भएको थियो भने सापकोटाको नाममा काटेको २२ लाखको चेक पनि बाउन्स भएको थियोे ।
उच्च अदालत पाटनले लामाविरुद्ध पक्राउपूर्जी जारी गरेपछि लामा फरार भएका थिए । उनलाई नेपाल प्रहरीको केन्द्रीय अनुसन्धान ब्यूरो (सिआईबी) ले पनि खोजी गर्दै आएको थियो । यस अधि उनी सिमाला लुटपाटको धन्दामा पनि सक्रिय रहँदै आएको बताइएको छ । काभ्रे प्रहरीले उनलाई काभ्रेको रोशी गाउँपालिका कटुन्जेबाट पक्राउ गरेको हो । हाल उनलाई काभ्रे प्रहरीले काठमाडौं पठाई उनीविरुरुद्ध काठमाडौं प्रहरीले मुद्दा चलाउने बताइएको छ ।
