नेपालगन्ज,नेपालगन्ज उप-महानगरपालिका वडा नम्बर तीनका वडा सदस्य जाफर अन्सारीको ४८ बर्षको उमेरमा निधन भएको छ । नेपाल कम्युनिस्ट पार्टी माओवादी केन्द्रको सदस्य समेत रहेका अन्सारीको निधनले वडा नम्बर तीन पूरै शोकमय भएको छ ।
उहाँको उपचारको क्रममा शनिबार साँझ ४:५० बजे नेपालगन्ज मेडिकल कलेजमा निधन भएको हो । हृदयघातका कारण वडा नम्बर तीनका जनप्रतिनिधि अन्सारीको निधन भएको परिवारिक स्रोतले जनाएको छ ।
स्वर्गीय अन्सारीको अन्त्येष्टि मिट्टी (अन्तिम संस्कार) आइतबार दिउँसो १ :३० बजे बाद नमाज-ए जोहर नेपालगन्जको वडा नम्बर ४ मा अवस्थित स्थानिय कब्रिस्तानमा हुने पारिवारिक स्रोतले बताएको छ ।
वडा नम्बर तीनका वडा अध्यक्ष अय्युब सिद्दिकीले जाफर अन्सारीको दुखद निधन भएको प्रति स्तब्ध भएको उल्लेख गर्नु भएको छ । स्वर्गीय अन्सारीको श्रीमती एउटा छोरा र एउटा छोरी छन ।
यस दुःखको घडिमा जनप्रतिनिधि वडा अध्यक्ष अय्युब सिद्दिकि र वडा कार्यालयले शोकाकुल परिवारजनमा गहिरो समवेदना प्रकट गर्दछ साथै वडाले स्वर्गिय अन्सारी प्रति भावपूर्ण श्रद्धाञ्जली प्रकट गरेको छ ।
स्वर्गिय अन्सारीको अल्लाहपाक मग्फिरत गरून् साथै जन्नतुल फिरदौशमा अला मुकाम अता गरून् । शोकाकुल परिवारजनलाई सब्र अता गरून भनी न्युज फ्ल्यास साप्ताहिक परिवार अल्लाहपाकसंग प्रर्थाना (दुआ) गर्दछ ।
