काठमाडौं । नेपाली लोकसङ्गीतको विशाल आकाशमा बेला–बेला नयाँ प्रतिभाहरू उदाउँछन्, जसले आफ्नो कला, सौन्दर्य र मेहनतका कारण छोटो समयमै दर्शकको मन जित्न सफल हुन्छन् । यतिबेला यस्तै एक नाम चर्चाको केन्द्रमा छिन्—अस्मिता बुढा मगर । पहिलो पटक म्युजिक भिडियोमा देखिएकी अस्मिताले आफ्नो पहिलो प्रस्तुतिबाटै दर्शकको मनमा गहिरो छाप छोड्न सफल भएकी छन् ।
रोल्पाको सुन्दर पहाडी परिवेशमा बुवा कुमार बुढा मगर र आमा धनमाया बुढा मगरको कोखबाट २०६० साल पौष ६ गते जन्मिएकी अस्मिताले बाल्यकालदेखि नै कला, नृत्य र सङ्गीतप्रति विशेष रुचि राख्दै आएकी थिइन् । त्यही रुचिलाई निरन्तरता दिँदै उनी अहिले काठमाडौंमा बसेर नृत्य र मोडलिङ क्षेत्रमा सक्रिय छिन् । उनको यही लगन, मेहनत र समर्पणले आज उनलाई नेपाली लोकसङ्गीत क्षेत्रमा नयाँ आशाको रूपमा स्थापित गराउँदै लगेको छ ।
हालै सार्वजनिक भएको मौलिक लोकगीत ‘रानी फूलैमा’ मार्फत अस्मिताले पहिलो पटक मोडलिङ क्षेत्रमा प्रवेश गरिन् । तर यो प्रवेश सामान्य रहेन । भिडियो सार्वजनिक भएलगत्तै दर्शकहरूले उनको अभिनय, अभिव्यक्ति, नृत्यकला र प्राकृतिक प्रस्तुतिको खुलेर प्रशंसा गर्न थालेका छन् । सामाजिक सञ्जालदेखि लोकसङ्गीतका विभिन्न मञ्चहरूसम्म अहिले अस्मिताको चर्चा हुन थालेको छ ।
लोकप्रिय गायिकाद्वय नीता थापा मगर र सुनिता थापा मगरसँगै चर्चित गायक कमल घर्ती मगर तथा दीपक घर्ती मगरको स्वर रहेको गीत ‘रानी फूलैमा’ नेपाली मौलिक संस्कृतिको सुन्दर प्रस्तुति बनेको छ । गीतमा समेटिएको प्रेम, भावना, गाउँघरको परिवेश र नेपालीपनलाई अस्मिताले आफ्नो अभिनयमार्फत जीवन्त बनाएकी छन् । उनको अनुहारको सहज मुस्कान, भावभङ्गी र नृत्यको तालमेलले भिडियोलाई अझ आकर्षक बनाएको दर्शकहरूको प्रतिक्रिया छ ।
गीतका शब्द सिद्धार्थ आले मगर र कमल घर्ती मगरले सिर्जना गरेका हुन् भने सङ्गीत पनि कमल घर्ती मगरकै रहेको छ । सङ्गीत संयोजन दीपक घर्ती मगरले गरेका छन् । रुबिन मगरको मिक्सिङ तथा मास्टरिङ, किरण आले मगरको रेकर्डिङ र आरोह स्टुडियोको प्राविधिक सहयोगले गीतलाई उत्कृष्ट बनाएको छ ।
त्यसैगरी भिडियो निर्माण पक्ष पनि निकै बलियो देखिन्छ । नेपाली लोकसङ्गीत क्षेत्रमा सफल निर्देशकका रूपमा स्थापित स्मृति तिमिल्सिना ‘गुरुआमा’को निर्देशनमा निर्माण गरिएको भिडियोमा अस्मितासँगै अजय पुन मगर, दीपक घर्ती मगर र पुष्पा सेन्चुरीको अभिनय रहेको छ । सुमित तामाङको छायाङ्कन, मिराज अर्यालको सम्पादन तथा रङ संयोजनले भिडियोलाई अझ आकर्षक बनाएको छ । नेपाली मौलिक भेषभूषा, संस्कृति र ग्रामीण जीवनशैलीलाई कलात्मक ढंगले प्रस्तुत गरिएको भिडियोले दर्शकलाई आफ्नै गाउँघरको सम्झना दिलाउने प्रयास गरेको छ ।
दीपक घर्ती मगरको आधिकारिक युट्युब च्यानलमार्फत सार्वजनिक गरिएको ‘रानी फूलैमा’ छोटो समयमै दर्शकमाझ लोकप्रिय बन्दै गएको छ । भिडियोको निर्माणपछिको काम रीमा फिल्म्सले गरेको हो भने अनमेष गुरुङले शृङ्गारको जिम्मेवारी सम्हालेका छन् ।
विशेष गरी पहिलो मोडलिङमै अस्मिता बुढा मगरले देखाएको आत्मविश्वास, स्वाभाविक अभिनय र आकर्षक नृत्यकलाले उनलाई भविष्यकी सम्भावनाशील मोडल तथा कलाकारको रूपमा स्थापित गर्ने संकेत देखिएको छ । नेपाली लोकसङ्गीत क्षेत्रमा नयाँ अनुहारहरूको खोजी भइरहेका बेला अस्मिताको आगमनले नयाँ ऊर्जा थपेको धेरैको बुझाइ छ ।
कलाक्षेत्रमा सफलता प्राप्त गर्न प्रतिभासँगै निरन्तर संघर्ष, धैर्यता र मेहनत आवश्यक पर्छ । अस्मिता बुढा मगरले आफ्नो पहिलो प्रस्तुतिबाट नै त्यो सम्भावनाको बलियो संकेत दिएकी छन् । यही निरन्तरता कायम रह्यो भने उनी निकट भविष्यमा नेपाली लोकदोहोरी तथा म्युजिक भिडियो क्षेत्रकी चर्चित र व्यस्त मोडल बन्नेमा धेरैले विश्वास गर्न थालेका छन् ।
‘रानी फूलैमा’ले केवल एउटा गीतको सफलता मात्र होइन, अस्मिता बुढा मगर नामक नयाँ प्रतिभाको उज्यालो यात्राको सुरुवात पनि संकेत गरेको छ । नेपाली लोकसङ्गीतको आकाशमा उदाउँदै गरेको यो नयाँ ताराले आगामी दिनमा अझ धेरै सफलता हासिल गरोस् भन्ने शुभेच्छा यतिबेला उनका दर्शक र शुभचिन्तकहरूले व्यक्त गरिरहेका छन् ।
