काठमाडौं । फलाम र स्टिलसँग दैनिक संघर्ष गर्दै जीविकोपार्जन गर्ने व्यवसायी तथा श्रमिकको स्वास्थ्य सुरक्षालाई केन्द्रमा राख्दै ग्रिल तथा स्टिल व्यवसायी संघ, काठमाडौं जिल्ला कार्यसमितिले उदाहरणीय सामाजिक अभियान सञ्चालन गरेको छ। व्यवसायका क्रममा चोटपटकको उच्च जोखिममा रहने व्यवसायी तथा कर्मचारीलाई लक्षित गर्दै संघले आयोजना गरेको निःशुल्क टी.टी. खोप तथा रक्तदान कार्यक्रममा करिब १७० जना व्यवसायी तथा कर्मचारी सहभागी भएका छन्। कार्यक्रममा ४० जना व्यवसायीले रक्तदान गरेका छन्।
यो कार्यक्रम स्वास्थ्य परीक्षण वा रक्तदानमा सीमित रहेन। यसले व्यवसायीको स्वास्थ्य सुरक्षा, श्रमिकको संरक्षण, सामाजिक उत्तरदायित्व र व्यवसायीबीचको एकतालाई एउटै अभियानमा जोड्दै नयाँ सन्देशसमेत दिएको छ।
कार्यक्रममा रिपब्लिक अफ माल्टाका अवैतनिक महावाणिज्यदूत तथा नेपाल उद्योग वाणिज्य महासंघका पूर्व उपाध्यक्ष दिनेश कुमार श्रेष्ठको प्रमुख आतिथ्यता तथा ग्रिल तथा स्टिल व्यवसायी महासंघका वरिष्ठ उपाध्यक्ष अमृत बहादुर श्रेष्ठको विशिष्ट आतिथ्यता रहेको थियो।
कार्यक्रममा ग्रिल तथा स्टिल व्यवसायी महासंघ नेपालका निवर्तमान अध्यक्ष तथा नेपाल घरेलु तथा साना उद्योग महासंघका वस्तुगत उपाध्यक्ष मोहन कटुवाल, हिमाल हस्पिटल प्रा.लि.का प्रबन्ध निर्देशक, महासंघका तृतीय उपाध्यक्ष तथा काठमाडौं जिल्लाका पूर्व अध्यक्ष यज्ञदास श्रेष्ठ, वस्तुगत उपाध्यक्ष रूपेन्द्र बानियाँ, महिला उपाध्यक्ष विष्णुमाया उचही, महासचिव विवेक दास श्रेष्ठलगायत महासंघका पदाधिकारी, सदस्य तथा सल्लाहकारहरूको उल्लेख्य उपस्थिति थियो।
कार्यक्रमलाई सम्बोधन गर्दै मोहन कटुवालले काठमाडौं जिल्ला समितिको नवनिर्वाचित कार्यसमितिलाई बधाई तथा सफल कार्यकालको शुभकामना दिँदै निर्वाचन सम्पन्न भएको एक महिना नपुग्दै व्यवसायी तथा कर्मचारीको स्वास्थ्यलाई प्राथमिकतामा राखेर टी.टी. खोप तथा रक्तदान कार्यक्रम आयोजना गरिएकोमा प्रशंसा व्यक्त गर्नुभयो। उहाँले व्यवसायीका लागि प्रत्यक्ष लाभ पुग्ने यस्ता रचनात्मक कार्यक्रमलाई निरन्तरता दिन आग्रह गर्दै व्यवसायीको हित र सुरक्षाका लागि संगठन केवल नेतृत्व गर्ने संस्था नभई सहारा बन्नुपर्ने धारणा व्यक्त गर्नुभयो।
कार्यक्रममा हिमाल हस्पिटल प्रा.लि.का प्रबन्ध निर्देशकले ग्रिल तथा स्टिल व्यवसायमा आबद्ध व्यवसायी तथा कर्मचारीलाई विभिन्न रोगको उपचार तथा स्वास्थ्य परीक्षणमा विशेष छुट उपलब्ध गराउने प्रतिबद्धता व्यक्त गर्नुभयो। यस घोषणाले जोखिमपूर्ण काममा संलग्न व्यवसायी तथा कर्मचारीलाई उपचार र स्वास्थ्य परीक्षणमा थप सहजता पुग्ने अपेक्षा गरिएको छ।
कार्यक्रमका प्रमुख अतिथि दिनेश कुमार श्रेष्ठले व्यवसायीलाई बैंक तथा वित्तीय संस्थाबाट सहुलियतपूर्ण ऋण प्राप्त गर्न आवश्यक सहजीकरण गर्ने प्रतिबद्धता व्यक्त गर्नुभयो।
त्यसैगरी ग्रिल व्यवसायमा प्रयोग हुने मेसिनरीमा समेत विशेष छुट उपलब्ध गराउने घोषणा गर्दै उहाँले व्यवसायीको आर्थिक तथा व्यावसायिक सशक्तीकरणमा सहकार्य गर्ने प्रतिबद्धता जनाउनुभयो। यसले स्वास्थ्य सुरक्षासँगै व्यवसायीको आर्थिक सबलीकरणलाई समेत कार्यक्रमको अर्को महत्वपूर्ण पक्षका रूपमा स्थापित गरेको छ।
कार्यक्रममा ४० जना व्यवसायीले रक्तदान गरेर सामाजिक उत्तरदायित्वको उदाहरण प्रस्तुत गरेका छन्। फलाम काट्ने, वेल्डिङ गर्ने, भारी सामग्री उठाउने र दैनिक जोखिमसँग जुधेर व्यवसाय सञ्चालन गर्ने व्यवसायीहरूले आफ्नै स्वास्थ्य सुरक्षाको चिन्तासँगै अरूको जीवन बचाउन रगतसमेत दिए। यसले व्यवसायी केवल नाफा र कारोबारमा सीमित समूह नभई समाजप्रति उत्तरदायी नागरिक पनि हुन् भन्ने सशक्त सन्देश दिएको छ।
यसै अवसरमा श्रेष्ठ मेसिनरी प्रा.लि.का तर्फबाट काठमाडौं जिल्ला समितिको नवनिर्वाचित कार्यसमितिलाई बधाई तथा सम्मानसमेत गरिएको थियो। कार्यक्रमको सञ्चालन ग्रिल तथा स्टिल व्यवसायी संघ, काठमाडौं जिल्ला कार्यसमितिका महासचिव यामबहादुर श्रेष्ठ ‘पशुपति’ले गर्नुभएको थियो।
कार्यवाहक अध्यक्ष भरत लामिछानेले व्यवसायी तथा कर्मचारीको हितलाई केन्द्रमा राख्दै आगामी दिनमा पनि स्वास्थ्य, सुरक्षा तथा सामाजिक उत्तरदायित्वसँग सम्बन्धित कार्यक्रमलाई निरन्तरता दिने प्रतिबद्धता व्यक्त गर्नुभयो।
ग्रिल तथा स्टिल व्यवसायमा संलग्न व्यक्तिहरूले दैनिक रूपमा आगो, फलाम, मेसिन, धारिला सामग्री तथा भारी वस्तुसँग काम गर्नुपर्ने भएकाले दुर्घटना र चोटपटकको जोखिम उच्च हुन्छ। यस्तो अवस्थामा टी.टी. खोपजस्ता स्वास्थ्य सुरक्षाका कार्यक्रम व्यवसायी तथा श्रमिकका लागि प्रत्यक्ष महत्व राख्ने देखिन्छ। त्यसैले यो कार्यक्रम एउटा सामान्य स्वास्थ्य शिविर मात्र नभई ‘व्यवसायीको सुरक्षा, श्रमिकको सम्मान र समाजप्रतिको जिम्मेवारी’लाई व्यवहारमै उतार्ने अभियानका रूपमा देखिएको छ।
कार्यक्रमले एउटा स्पष्ट सन्देश दिएको छ— व्यवसाय बलियो हुन व्यवसायी स्वस्थ हुनुपर्छ। व्यवसायी सुरक्षित हुन श्रमिक सुरक्षित हुनुपर्छ।
र संगठन बलियो हुन एकता र सहकार्य आवश्यक हुन्छ।यही भावनालाई आत्मसात् गर्दै ग्रिल तथा स्टिल व्यवसायी संघ, काठमाडौं जिल्ला कार्यसमितिले अघि सारेको अभियानले “स्वस्थ व्यवसायी, सुरक्षित श्रमिक र संगठित व्यवसाय”को अवधारणालाई थप बलियो बनाएको छ।
कार्यक्रम सफल बनाउन सहयोग गर्ने हिमाल हस्पिटल प्रा.लि., श्रेष्ठ मेसिनरी प्रा.लि., सम्पूर्ण अतिथिहरू, रक्तदाता व्यवसायी, स्वास्थ्यकर्मी तथा सहभागी व्यवसायी एवं कर्मचारीप्रति ग्रिल तथा स्टिल व्यवसायी संघ, काठमाडौं जिल्ला कार्यसमितिले हार्दिक आभार तथा धन्यवाद व्यक्त गरेको छ।
