गोरखा — हिमालय हब एडभेन्चर काठमाडौं का सञ्चालक प्रकाश लामिछाने तथा पुरुषोत्तम रिमाल ( पुरु ) को समन्वयमा गोरखाको सिद्धदेवि माध्यमिक विद्यालयमा शैक्षिक तथा प्रविधिसम्बन्धी सामग्री हस्तान्तरण गरिएको छ।
विद्यालयको शैक्षिक गुणस्तर अभिवृद्धि गर्ने उद्देश्यले आयोजित सामग्री हस्तान्तर कार्यक्रममा २ वटा ल्यापटप, २ वटा आईप्याड, २ वटा आईफोन तथा विभिन्न स्टेशनरी सामग्री विद्यालयलाई हस्तान्तरण गरिएको हो। ग्रामीण क्षेत्रका विद्यार्थीहरूलाई आधुनिक प्रविधिसँग जोड्ने तथा अध्ययन–अध्यापनलाई थप प्रभावकारी बनाउने उद्देश्यका साथ उक्त सामग्री वितरण गरिएको बताइएको छ।
कार्यक्रममा विद्यालय व्यवस्थापन समिति, शिक्षक, विद्यार्थी तथा स्थानीय अभिभावकहरूको उपस्थिति रहेको थियो। विद्यालय प्रशासनले प्राप्त सामग्रीले विद्यार्थीहरूको सिकाइ प्रक्रियामा सकारात्मक प्रभाव पार्ने विश्वास व्यक्त गरेको छ। विशेषगरी कम्प्युटर तथा डिजिटल उपकरणको अभाव भइरहेका बेला प्राप्त सहयोगले विद्यालयमा सूचना प्रविधिमैत्री शिक्षण वातावरण निर्माण गर्न मद्दत पुग्ने विद्यालय पक्षको भनाइ रहेको छ।
सहयोग कार्यक्रमलाई सम्बोधन गर्दै लामिछानेले ग्रामीण क्षेत्रका विद्यार्थीहरू पनि प्रविधिमैत्री शिक्षाबाट वञ्चित हुन नहुने बताए। उनले शिक्षा क्षेत्रमा सानो सहयोगले पनि ठूलो परिवर्तन ल्याउन सक्ने विश्वास व्यक्त गर्दै आगामी दिनमा पनि यस्ता सामाजिक कार्यलाई निरन्तरता दिने प्रतिबद्धता जनाए।
उनका अनुसार हिमाली पर्यटन क्षेत्रमा काम गर्दै आए पनि समाजप्रति उत्तरदायित्व वहन गर्नु प्रत्येक व्यक्तिको दायित्व भएकाले शिक्षा, स्वास्थ्य तथा सामाजिक क्षेत्रमा सक्दो सहयोग गर्दै आएको बताए। विशेषगरी दुर्गम क्षेत्रका विद्यालयहरूमा अध्ययनरत विद्यार्थीहरूलाई आवश्यक शैक्षिक सामग्री उपलब्ध गराउन सके भविष्य निर्माणमा सकारात्मक योगदान पुग्ने उनको भनाइ थियो। विद्यालयका शिक्षक तथा स्थानीयवासीहरूले यस्तो सहयोगले विद्यार्थीहरूमा नयाँ उत्साह थपिएको बताएका छन्। डिजिटल उपकरणको प्रयोगबाट विद्यार्थीहरूले आधुनिक सिकाइ प्रणालीबारे जानकारी पाउने र प्रविधिसँग नजिक हुने अपेक्षा गरिएको छ।
साथै स्टेशनरी सामग्रीले आर्थिक रूपमा कमजोर विद्यार्थीहरूलाई राहत मिल्ने विश्वास गरिएको छ। यसअघि पनि लामिछानेले गोरखाकै भीमसेन थापा गाउँपालीका अन्तर्गत रहेका ४ वटा विद्यालयमा शैक्षिक सहयोग प्रदान गरिसकेका छन्। ती विद्यालयहरूमा पनि अध्ययन सामग्री तथा आवश्यक शैक्षिक उपकरण वितरण गरिएको थियो। शिक्षा क्षेत्रमा निरन्तर योगदान पुर्याउँदै आएका लामिछाने को सामाजिक कार्यप्रति स्थानीय स्तरमा सकारात्मक प्रतिक्रिया देखिएको छ।
ग्रामीण विद्यालयहरूको आवश्यकता पहिचान गरी गरिएको यस्तो सहयोगले विद्यार्थीहरूको भविष्य उज्यालो बनाउन महत्वपूर्ण भूमिका खेल्ने विश्वास गरिएको छ। वितरण कार्यक्रममा आरुघाट गाउँपालिक वडा नम्बर 10 का वडा अध्यक्ष संजित श्रेष्ठ, वडा सदस्यहरू र उत्त विद्यालय व्यवस्थापन समितीका अध्यक्षा तथा प्राधानाध्यपक अर्जुन लामिछानेको उपस्थिति रहेको थियोे ।
साथै विद्यालयमा अध्यापनरत शिक्षक, शिक्षिकाहरू, स्थानीय, अभिभावका र विद्यार्थीहरूकाे महत्त्वपूर्ण उपस्थितिमा वितरण कार्य सम्पन्न भएको थियोे । संस्थाका सञ्चालक रामेश भट्टराईले विद्यार्थीहरूकाे व्यक्तित्व नेतृत्व विकास साथै रचनात्मक गतिविधि सञ्चालन गर्न आउदाे दिनमा पनि निरन्तर सहयाेग गर्ने वताउनु भएको थियोे ।
