काठमाडौं । चौथो राष्ट्रिय एक्टिभ म्युजिक अवार्ड–२०८२ मा फोटोग्राफर तथा खेलाडी कृष्ण खाती सम्मानित भएका छन्। कला, खेलकुद र फोटोग्राफी क्षेत्रमा उनले पुर्याएको योगदानको कदर गर्दै उनलाई विशेष सम्मान प्रदान गरिएको आयोजकले जनाएको छ।
कार्यक्रममा विभिन्न विधामा सक्रिय स्रष्टा, कलाकार तथा प्रतिभाहरूलाई सम्मान गर्ने क्रममा कृष्ण खातीलाई फोटोग्राफर र खेलाडी दुवै रूपमा निरन्तर समर्पण र उत्कृष्ट कार्यका लागि सम्मानित गरिएको हो। उनले लामो समयदेखि खेलकुद क्षेत्रमा सक्रिय रहँदै फोटोग्राफीमार्फत विभिन्न सांस्कृतिक, सामाजिक तथा खेलसम्बन्धी गतिविधिहरूलाई दस्तावेजीकरण गर्दै आएका छन्।
अवार्ड समारोहमा उपस्थित अतिथिहरूले खातीको मेहनत, अनुशासन र सिर्जनशीलताले नयाँ पुस्तालाई प्रेरणा दिएको उल्लेख गर्दै आगामी दिनमा अझ उत्कृष्ट कार्य गर्ने विश्वास व्यक्त गरे। सम्मान ग्रहणपछि उनले आफूलाई दिइएको सम्मानले थप जिम्मेवारी र हौसला मिलेको बताउँदै भविष्यमा पनि कला, खेलकुद र फोटोग्राफीमार्फत समाजमा सकारात्मक योगदान दिने प्रतिबद्धता व्यक्त गरे।
चौथो राष्ट्रिय एक्टिभ म्युजिक अवार्ड–२०८२ ले संगीत, कला तथा सृजनशील क्षेत्रमा सक्रिय व्यक्तित्वहरूलाई सम्मान गर्दै उनीहरूको योगदानको कदर गर्ने उद्देश्यले कार्यक्रम आयोजना गरिएको हो। यस कार्यक्रममा विभिन्न विधामा आबद्ध स्रष्टा, कलाकार, मोडल, प्राविधिक तथा खेलकुद क्षेत्रका प्रतिनिधिहरूको उल्लेखनीय सहभागिता रहेको थियो।
