युनाइटेड अरब इमिरेट्सको दुबईमा आइतबार भएको ग्लोब सकर अवार्डमा रोनाल्डोले समकालीन लियोनल मेस्सी र मोहम्मद सलाह अनि लिजेण्ड खेलाडी रोनाल्डिन्होलाई पछि पार्दै २१औं शताब्दीका उत्कृष्ट खेलाडी “प्लेअर अफ दि सेन्चुरी” अवार्ड जितेका छन् । दुबईमा भएको सो अवार्ड कार्यक्रममा रोनाल्डो सन् २००१ देखि २०२० सम्मको उत्कृष्ट खेलाडी चुनिएका हुन् । पाँच पटकका “बलोन डी ओर” बिजेता रोनाल्डोले पाँचपटक च्याम्पियन्स लिग, म्यानचेष्टर युनाइटेडबाट तीन प्रिमियर लिग, रियल मड्रिडबाट दुई ला लिगा र पोर्चुगलका लागि युरो कप र नेसन्स लिग जितेका छन् ।
रोनाल्डो उत्कृष्ट शताब्दी खेलाडी घोषित हुँदा उनको पुर्व क्लब रियल मड्रीडले २१ औं शताब्दीकै उत्कृष्ट क्लबको अवार्ड हात पारेको छ । स्पेनमा रियल म्याड्रिडले किर्तिमानी ३३ ला लिगा, १९ कोपा डेल रे, १० स्पेनिस सुपरकोपा सहित उपाधीहरु जितेका छन् । यसबाहेक युरोप र विश्वमा यस मड्रीड क्लबले १३ युरोपियन च्याम्पियन्स लिग, २ युइएफए कप, ४ युइएफए सुपर कप, ३ इन्टरकन्टिनेन्टल कप र ४ फिफा क्लब वर्ल्डकप सहित किर्तिमानी २६ उपाधीहरु जितेका छन् । सन् २०१७ मा रियल म्याड्रिडले लगातार ३ सिजन च्याम्पियन्स लिग जित्दै पहिलो कीर्तिमान राख्न सफल भएको थियो ।
सो ग्लोबल सकर अवार्डमा बार्यन म्युनिखका पोलिस खेलाडी रोवर्ट लेवान्डोस्कीले रोनाल्डो र लिओनल मेसीलाई पछि पार्दै सन् २०२० को वर्षको उत्कृष्ट खेलाडीको अवार्ड जिते । बायर्न म्युनिखकै प्रशिक्षक हान्सी फ्लिकले उत्कृष्ट प्रशिक्षकको अवार्ड जित्दा बायर्नले क्लब अफ दि इअरको अवार्ड जिते । दुई स्पेनिस् खेलाडी गोकिपर इकर कासियास र डिफेण्डर जेरार्ड पिकेले प्लेअर करियर अवार्ड प्राप्त गरे भने पेप ग्वार्ढिओला कोच अफ दि सेन्चुरी घोषित भए ।
